काठमाडौं, ललितपुर र भक्तपुर जिल्ला प्रशासनमा अत्यावश्यक बाहेकका सेवा बन्द
![](https://i0.wp.com/www.risingsunkhabar.com/wp-content/uploads/2021/04/Annotation-2021-04-25-173659.jpg?fit=826%2C464&ssl=1)
काठमाडौं । काठमाडौं उपत्यकाका तीन जिल्ला प्रशासन कार्यालयमा अत्यावश्यकबाहेक सबै सेवा एक साता बन्द हुने भएका छन् ।
आइतबार बसेको काठमाडौं, भक्तपुर र ललितपुरका प्रमुख जिल्ला अधिकारीहरुको बैठकले अत्यावश्यक बाहेक सबै सेवा एक साताका लागि बन्द गर्ने निर्णय गरेको हो ।
काठमाडौंका प्रमुख जिल्ला अधिकारी कालीप्रसाद पराजुलीका अनुसार कोभिड–१९ संक्रमण जोखिमलाई ध्यान दिँदै सो निर्णय गरिएको हो । कार्यालयमा कार्यरत केही कर्मचारीमा कोरोना संक्रमण देखिएको र उनीहरुको सम्पर्कमा रहेका कर्मचारीले परीक्षणसँगै होम आइसोलेशनमा बस्नुपर्ने भएकाले अत्यावश्यक बाहेकका सेवा बन्द गरिएको काठमाडौं प्रशासनले जनाएको छ ।
उपत्यकाका तीन वटै जिल्ला प्रशासन कार्यलयबाट सोमबारदेखि वैशाख २० गतेसम्म अत्यावश्यक सेवा मात्र लिन सकिनेछ । जसअनुसार शान्ति सुरक्षा र मुद्दासँग सम्बन्धी सेवा लिन सकिने छ । नागरिकता, राहदानी लगायत सेवा भने बन्द हुनेछन् ।
अत्यावश्यक सेवा लिन आउने सेवाग्राहीलाई भीडभाड नगर्न र स्वास्थ्य सुरक्षा मापदण्ड पूर्ण रुपमा पालना गर्न प्रशासनले अनुरोध गरेको छ ।
-आइएनए न्युज एजेन्सी