नेपाली राष्ट्रिय क्रिकेट टाेलीकाे बन्द प्रशिक्षण सुरु
काठमाडौं । नेपाली राष्ट्रिय क्रिकेट टाेलीकाे बन्द प्रशिक्षण सुरु भएकाे छ ।
आईसीसी विश्वकप क्रिकेट लिग-२ अन्तर्गत स्कटल्याण्ड र नामिबियासँगको त्रिकोणात्मक एकदिवसीय सिरिजका लागि नेपाली टाेलीकाे बन्द प्रशिक्षण आजदेखि सुरु भएकाे हाे । टाेलीले कीर्तिपुरस्थित त्रिवि क्रिकेट मैदानमा प्रशिक्षण थालेकाे नेपाल क्रिकेट संघ (क्यान) ले जनाएकाे छ ।
साउन ५ देखि स्पेनमा हुने सिरिजका लागि क्यानले बन्द प्रशिक्षणका लागि २० खेलाडीलाई बोलाएको छ । तर पृथु बास्कोटा भने प्रशिक्षणमा सहभागी नभएका क्यानले जनाएकाे छ । बन्द प्रशिक्षणमा सहभागी हुने खेलाडी र अफिसियलको साेमबार पीसीआर विधिबाट काेभिड परीक्षण गरिएकाे थियाे । सबैकाे रिपोर्ट नेगेटिभ आएको छ ।
सन् २०१९ देखि सुरु भएको विश्वकप लिग-२ सिरिजअन्तर्गत नेपालले अहिलेसम्म एउटा सिरिज मात्र खेलेको छ । नेपालले सन् २०२० मा ओमान र अमेरिकासँग सिरिज खेलेको थियो । जसमा नेपालले ओमानसँग हारेकाे थियाे भने अमेरिकालाई दुबै खेलमा हराएकाे थियो । ४ खेलबाट २ मा जित र २ मा हारसहित नेपाल ४ अंकका साथ अंक तालिकाकाे छैटौं स्थानमा छ । लिग-२ अन्तर्गत नेपालले अझै ३२ वटा खेल खेल्न बाँकी छ ।
लिग-२ मा नेपालसहित ओमान, अमेरिका, नामिबिया, स्कटल्यान्ड, पपुवा न्युगिनी र युएई गरी ७ टाेलीबीच प्रतिष्पर्धा भइरहेको छ । त्रिकोणात्मक सिरिज २०२३ फेब्रुअरीसम्म चल्ने छ । शीर्ष तीनमा पर्ने टोलीले २०२३ मा भारतमा हुने एकदिवसिय विश्वकपका लागि ग्लोबल छनोटमा ठाउँ बनाउने छन्
