मन्थलीमा तीन तले घरको एउटा तलो पुरै जमिन मुनि दवियाे
काठमाडौं । रामेछापको सदरमुकाम मन्थलीमा तीन तले घरको एउटा तलो पुरै जमिन मुनि दविएको छ ।
तीन तले घरको एउटा तलो नै जमिनमुनि दविएपछि स्थानीयवासी चकित परेका छन् ।
मन्थली नगरपालिका–१ को बसपार्क नजिकै हिराबहादुर माझीको पक्की घर लगातारको वर्षाको कारण शुक्रबार केही धसिएको थियो । घर धसिएर भत्किइ क्षति हुने अवस्था भएपछि शुक्रबार मन्थली नगरपालिकाले सो घर भत्काउन सुरु गरेको थियो ।
शुक्रबार घरको केही भाग भत्काएर नगरपालिकाले छाडेको थियो । तर शनिबार बिहान घरको एउटा तला पुरै जमिन भित्र भासिएर पुरिएको थियो । बिहान हेर्दा घरको माख्लो तल्लाको गेट भुइँतल्लाको गेटमा आइपुगेको घरधनी माझीले बताउनुभयो । ‘के दिन लाग्यो, आश्चर्य नै भयो’, उहाँले भन्नुभयो ।
घरको एउटा तला पुरै जमिनमुनि भासिए पछि नगरपालिकाले शनिबार दिनभरि लगाएर सो घर भत्काएको छ । घर माथिको जमिन भिरालो पाखो भए पनि अगाडिका भाग भने समथल सडक छेउमा नै रहेको थियो ।
सो घर माझीले झण्डै एक करोड रुपैँया लगानी गरी पाँच वर्ष अघि बनाउनुभएको थियो । पक्की घरको एउटा तलो एक रातमा नै जमिनमुनि धसिए पछि सबै चकित परेका छन् ।
