राष्ट्रपति विद्यादेवी भण्डारी आज गृह जिल्ला जाँदै

काठमाडौं । राष्ट्रपति विद्यादेवी भण्डारी बुधबार गृह जिल्ला भोजपुर जाँदै हुनुहुन्छ ।

आफ्नै पहलमा निर्माण भएकाे शिक्षालय उद्घाटनका लागि राष्ट्रपति भण्डारी आज भाेजपुर जान लाग्नुभएकाे हाे । उहाँले आफ्नाे जन्मगाउँ रामप्रसाद राई गाउँपालिका-५ मानेभञ्याङकाे आमबोटेमा निर्माण भएको श्रीराम मिथिला बहुप्राविधिक शिक्षालय उद्घाटन गर्नुहुनेछ ।

राष्ट्रपति भण्डारीको पहलमा ११ करोड ३९ लाख ७३ हजार ८०० रुपैयाँ लागतमा शिक्षालय निर्माण गरिएको हो । जन्मघर नजिकै ५५ रोपनी क्षेत्रफलमा निर्माण भइरहेको प्राविधिक शिक्षालयलाई राष्ट्रपति भण्डारीले ३७ रोपनी र उहाँको परिवारले १८ रोपनी जग्गा निःशुल्क दिएको छ ।

राष्ट्रपति भण्डारीले बेहेरेश्वर महादेव र शिवालयमा दर्शन गर्ने तथा आफू अध्ययन गरेको बेहेरेश्वर माध्यमिक विद्यालयको निरीक्षण गर्ने कार्यक्रम समेत छ ।