आइसिसी यु–१९महिला टी–२० विश्वकप एसिया छनोट : आज नेपालले थाइल्याण्डसँग खेल्दै
काठमाडौं । आइसिसी यु–१९महिला टी–२० विश्वकप एसिया छनोटअन्तर्गत आज नेपालले चौथो खेल थाइल्याण्डसँग खेल्दै छ ।
युनाइटेड अरब इमिरेट्स (युएई) मा जारी नेपाल र थाइल्याण्डबीचको खेल आज दिउँसो ३ः१५ बजे सुरु हुने छ । यस अघि नेपालले तीन खेल खेली सकेको छ ।
बुधबारदेखि सुरु भएको प्रतियोगितामा नेपालले पहिलो खेल थाइल्याण्डसँग खेलेको थियो । उक्त खेलमा नेपालले थाइल्याण्डलाई ६७ रनले हराएको थियो ।
नेपालले दोस्रो खेल बिहीबार कुवेतसँग खेलेको थियो । सो खेलमा नेपालले कुवेतलाई १ सय ८ रनको विशाल अन्तरले हराएको थियो ।
शनिबार भएको तेस्रो खेलमा भने नेपाल युनाइटेड अरब इमिरेट्स (युएई)सँग पराजित भएको थियो । सो खेलमा नेपाल युएईसँग १३ रनले पराजित भएको थियो ।
प्रतियोगितामा नेपाल सहित, युएई, कुवेत र थाइल्याण्ड सहभागी छन् । प्रत्येक टोलीले एक अर्कासँग दुई दुई खेल खेल्ने छन् ।
सहभागी चार टोलीमध्ये शीर्ष स्थान हासिल गर्ने टोली आइसिसी यु–१९ महिला टी–२० विश्वकपका लागि छनोट हुनेछ । यु–१९ विश्वकप क्रिकेट प्रतियोगिता अर्को वर्ष जनवरीमा मलेसियामा हुँदै छ ।
