एसीसी यु-१९ एसिया कप : नेपाल बंगलादेशसँग ५ विकेटले पराजित
काठमाडौं । युनाईटेड अरब इमिरेट्स (युएई) जारी एसीसी यु-१९ एसिया कप क्रिकेटमा नेपाल बंगलादेशसँग पराजित भएको छ ।
आइतबार युएईको दुबई क्रिकेट स्टेडियममा भएकाे आफ्नाे दाेस्राे खेलमा नेपाल बंगलादेशसँग ५ विकेटले पराजित भएकाे हाे ।
नेपालले दिएकाे १ सय ४२ रनको लक्ष्य पछ्याएको बंगलादेशले २८ ओभर ४ बलमा ५ विकेट गुमाएर लक्ष्य पूरा गर्याे । उसका लागि जवाद अबरार ५९ र कप्तान अजिजुल हाकिम तमिमले ५२ रन बनाए ।
नेपालका लागि युवराज खत्रीले ४ र हेमन्त धामीले १ विकेट लिए ।
त्यसअघि टस जितेर पहिला ब्याटिङ राेजेकाे नेपालले ४५ ओभर ४ बलमा अलआउट हुँदै १ सय ४१ रन बनाएकाे थियाे । नेपालका लागि आकाश त्रिपाठीले ४३ तथा उत्तम मगर र आकाश तिवारीले समान २९-२९ रन बनाए । अरुले दाेहाेर अंकमा रन जाेड्न सकेनन् ।
बलिङतर्फ बंगलादेशका अल फहाद, इकबाल हुसेन इमन र रिजान होसनले समान ३-३ विकेट लिए ।
नेपालकाे याे दाेस्राे हार हाे । नेपाल पहिलो खेलमा श्रीलंकासँग पराजित भएकाे थियाे । बंगलादेशले भने पहिलो खेलमा अफगानिस्तानलाई हराएकाे थियाे ।
प्रतियोगितामा एसियाका ८ देश सहभागी छन् । सहभागी टोलीलाई २ समूहमा विभाजन गरिएको छ । समूह ‘ए’ मा भारत, पाकिस्तान, जापान र युएई छन् । समूह ‘बी’ मा नेपाल श्रीलंका, बंगलादेश र अफगानिस्तान छन् ।
समूहका शीर्ष २ टोली सेमिफाइनल पुग्नेछन् । फाइनल मंसिर २३ गते हुनेछ ।
