सोनाम ल्होसारले शान्ति, सद्भाव र समृद्धि ल्याउन सबैलाई प्रेरणा दिने : शेरबहादुर देउवा

काठमाडौं । नेपाली काँग्रेसका सभापति शेरबहादुर देउवाले सोनाम ल्होछारले मुलुकमा शान्ति, सद्भाव र समृद्धि ल्याउन सबैलाई प्रेरणा दिने बताउनुभएको छ ।

ल्होसारको अवसरमा बिहीबार शुभकामना सन्देश दिँदै देउवाले नेपालका धर्म, संस्कृतिले सामाजिक सद्भाव कायम गर्न सहयोग गर्ने स्पष्ट पार्नुभएको छ । ‘यो पर्वले मुलुकमा शान्ति, सद्भाव र समृद्धि ल्याउन सबैलाई प्रेरणा दिने मैले विश्वास लिएको छु र यस अवसरमा सबैमा शुभकामना व्यक्त गर्दछु’, देउवाले सोनाम ल्होसारको अवसरमा जारी गर्नुभएको सन्देशमा उल्लेख छ ।

विविधताले भरिएको नेपाली समाजमा गर्व गर्न लायक धार्मिक सांस्कृतिक रीति रिवाज र परम्परा रहेको देउवाले बताउनुभएको छ । ‘जस मध्ये सोनाम ल्होसारले जनजीवनमा गहिरो छाप र विशिष्ट पहिचान बनाएको छ, तामाङ जातिहरू प्रकृति प्रेमीका रूपमा चिनिन्छन्, सोनाम ल्होसारमा तामाङ जातिले कुलपूजा र प्रकृतिको पूजा गर्ने तथा अन्य समुदाय र सबै धर्मका व्यक्तिहरूलाई खुल्ला हृदयले स्वागत गर्दै विशेष गरी देशका विभिन्न भागहरूमा मनाइने सोनाम ल्होसार (नयाँ वर्ष) ले आफ्ना धर्म, संस्कृति, रीतिरिवाज र परम्पराको संरक्षणमा लाग्न सबैलाई प्रेरित गर्दै सामाजिक सद्भावना बढाएका छन्’, देउवाले दिनुभएको शुभकामना सन्देशमा उल्लेख छ ।

बौद्ध धर्मावलम्बीहरूको अत्यन्त महत्त्वपूर्ण पर्व ‘सोनाम ल्होसार’ अर्थात् नयाँ वर्षको उपलक्ष्यमा स्वदेश तथा विदेशमा रहेका बौद्ध मार्गीमा उहाँले शुभकामना व्यक्त गर्नुभएको छ ।