एमाले वैठकमा गोविन्द थापाद्धारा म्याग्नेशियम र सोडियमको चर्चा
काठमाडौं । एमालेभित्रकै मानिसहरुलाई म्याग्नेशियम र सोडियमका रुपमा प्रयोग गरिएको छ कि ? यस्तो प्रश्न एमाले केन्द्रीय कमिटी वैठकमा उठेको छ । केन्द्रिय सदस्य गोविन्द थापाले यस्तो प्रश्न उठाउनुभएको थियो ।
भदौ २४ गते सिंहदरबार, सर्वाेच्च अदालत, संसद् सहित ठूला भवनहरु जलाउन संगठित गिरोहले महिनौंको तयारीपछि म्याग्नेशियम र सोडियम जस्ता घातक रासायनिक पदार्थ प्रयोग गरेको न्यूयोर्क टाइम्स अखबारले खुलासा गरेको छ । सो विषय उठाउँदै थापाले सिंहदरबार र संसद जलाउन प्रयोग गरे जसरी एमालेलाई जलाउन पनि म्याग्नेशियम र सोडियम प्रयाग गरिने खतरा औंल्याउनुभयो ।
वैठकमा उहाँले भन्नुभयो– ‘षडयन्त्रकारीहरुले जेन्जीलाई अगाडि सारेर म्याग्नेशियम र सोडियम प्रयोग गरेर देश जलाए, उनीहरु नेकपा एमालेलाई पनि जलाउन चाहन्छन् भन्ने हामीले बुझेका छौं कि छैनौं ? षडयन्त्रकारीहरु नेकपा एमालेका अध्यक्ष केपी ओलीलाई पनि जलाउन चाहन्छन् भन्ने बुझेका छौं कि छैनौं ? एमाले र ओलीलाई म्याग्नेशियम र सोडियमले सिध्याउन सकिँदैन, त्यसका लागि एमालेभित्रकै व्यक्तिहरुलाई म्याग्नेशियम र सोडियमका रुपमा प्रयोग गर्नुपर्ने हुन्छ ।’
केपी ओलीले अध्यक्ष पद छाड्नुपर्छ भन्नेहरुले कतै आफू म्याग्नेशियम र सोडियम बनिरहेको त छुइन भनेर आफैलाई सोध्नुपर्ने विचार थापाले राख्नुभयो ।
थापाले भन्नुभयो– ‘सत्रु सामुन्ने आइसक्यो, सत्रुले देश जलाई सक्यो । सत्रुले जेजे गर्नुपर्ने गरिसक्यो । सत्रुले भदौ २३ गते भीडमा घुसेर गोलीकाण्ड मच्चायो, गोलीले मान्छे भुट्ने अवस्था सिर्जना गर्न षडयन्त्र गर्यो ।’
सत्रुले अब म्याग्नेशियम र सोडियम कसरी प्रयोग गर्ने योजना बनाएको छ भन्ने हामीलाई थाहा छैन, हामीलाई के थाहा छ भने सत्रुको भण्डारबाट म्याग्नेशियक र सोडियम सकिएको छैन भन्ने विचार थापाको थियो ।
केपी ओलीले अध्यक्ष पद छाड्नुपर्छ भन्ने विचार केहीले राखेको सन्दर्भ निकाल्दै थापाले भन्नुभयो– ‘केपी ओलीले के छाड्ने ? नेकपा एमालेको अध्यक्ष पद छाड्ने हो ? भदौ २३ र २४ आएको थिएन भने शायद म पनि भन्थें, अध्यक्षज्यूले अब भारी बिसाए हुन्छ । तर, २३ र २४ जसरी आयो, म भन्छु, केपी ओलीले एमाले अध्यक्ष पद छाड्न पाउनुहुन्न । देश यस्तो अवस्थामा पुगेको बेला केपी ओलीले छाड्न कसरी मिल्छ ? यो संकटबाट देशले पार पाएपछि छाडे हुन्छ तर अहिले छाड्न मिल्दैन । मिल्दै मिल्दैन ।’
षडयन्त्रकारीहरुले नेपाललाई सिध्याउन चाहेको विचार राख्दै थापाले नेपाललाई सिध्याउनका लागि नेकपा एमालेलाई सिध्याउन चाहन्छन्, एमालेलाई सिध्याउन केपी ओलीलाई सिध्याउन चाहन्छन् भन्नुभयो ।
षडयन्त्रकारीहरुले जुन केपी ओलीलाई सिध्याउन यति ठूलो ग्राण्ड डिजाइन गरे, उही केपी ओलीलाई एमालेले सिध्याउने ? यस्तो प्रश्न थापाले उठाउनुभयो ।
