काभा महिला भलिबलको उपाधिका लागि आज नेपालले र भारसँग खेल्ने

काठमाडौं । काभा वुमन्स नेसन्स भलिबलको उपाधिका लागि आज भारत र नेपालबिच प्रतिस्पर्धा हुने भएको छ ।

नेपाल र भारतको फाइनल खेल दशरथ रंगशाला कभर्डहलमा बुधबार साँझ पाँच बजे सुरु हुनेछ ।

घरेलु टोली नेपालले सेमिफाइनलमा इरानलाई मंगलबार ३–० को सोझो सेटमा पराजित गर्दै फाइनलमा भारतसँगको भिडन्त पक्का गरेको हो ।

लिग चरणमा भएको इरानसँगको पराजयको बदला नेपालले सेमिफाइनलमा लिएको हो । लिग चरणमा इरानले नेपाललाई पाँच सेटमा हराएको थियो ।

यस अघि समूह चरणको खेलमा नेपालले भारतलाई हराएको थियो । उक्त भेटको पहिलो सेट नेपालले २५–१८ ले जितेको थियो । खेलको दोस्रो सेट भारतले २५–१२ ले जितेकोमा तेस्रो सेट नेपालले भारतलाई २५–१७ ले हराएको थियो । चौथो सेट १८–२५ ले हारेको नेपालले अन्तिम तथा पाँचौँ सेटमा भारतलाई १५–१३ ले पराजित गर्दै जित निकालेको थियो ।