विश्वभर कोरोनाबाट ज्यान जानेकाे संख्या ३० लाख बढी, सङ्क्रमण बढ्नेक्रम यथावत्

पेरिस । विश्वभर कोरोनाभाइरसको सङ्क्रमणबाट ज्यान जानेकाे संख्या ३० लाख २३ हजार नाघेको छ ।

विश्व स्वास्थ्य संगठन र जोन हप्किन्स विश्वविद्यालयको विवरण अनुसार कोरोनाभाइरसको महामारीबाट १४ करोड १५ लाखको हाराहारीमा मानिस सङ्क्रमित भएका छन् ।

सन् २०१९ को डिसेम्बरमा चीनको उहान शहरमा देखा परेको भनिएको कोरोनाभाइरसबाट सर्वाधिक असर युरोप र अमेरिकामा परेको भेटिएको छ । विश्वभर अझै पनि सक्रिय सङ्क्रमितको संख्या एक करोड ८४ लाख छ जसमा मध्यम किसिमका लक्षण भएकाहरु एक करोड ८२ लाख छ भने गम्भीर अवस्थामा उपचार गराइरहेकाहरु एक लाख सात हजार छन् ।

कोरोनाभाइरस सङ्क्रमितमध्ये झण्डै १२ करोड मानिस सङ्क्रमणमुक्त भएका छन् । कूल सङ्क्रमितमध्ये करिब २ प्रतिशत अर्थात् ३० लाख २३ हजारको ज्यान गएको छ । पछिल्ला विवरणमा संयुक्तराज्य अमेरिका कोरोनाभाइरसबाट सर्वाधिक प्रभावित छ । अमेरिकामा हालसम्म तीन करोड २३ लाख सङ्क्रमित भएकामा ५ लाख ८० हजारको ज्यान गएको छ । दोस्रो स्थानको ब्राजिलमा एक करोड ३९ लाख सङ्क्रमितमध्ये ३ लाख ७१ हजारको ज्यान गएको छ ।

त्यस्तै, भारतमा एक करोड ४८ लाख सङ्क्रमित भएकामध्ये एक लाख ७७ हजारको ज्यान गएको छ ।

युरोपमा हालसम्म चार करोड २७ लाख सङ्क्रमित भएकामा नौ लाख ७४ हजारको ज्यान गएको छ जसमा बेलायतमा एक लाख २७ हजार, इटालीमा एक लाख १६ हजार, रसियामा एक लाख पाँच हजार, फ्रान्समा एक लाख, जर्मनीमा ८० हजार, स्पेनमा ७६ हजार, पोल्यान्डमा ६१ हजार, युक्रेनमा ३९ हजार रहेका छन् ।

यस्तै, उत्तर अमेरिकी महादेश अन्तर्गत संयुक्तराज्य अमेरिकामा ५ लाख ८० हजार, मेक्सिकोमा २ लाख १२ हजार, क्यानडामा २३ हजार, ग्वाटेमालामा सात हजार, पनामा ६ हजार, होन्डुरसमा ५ हजार, डोमिनिकन रिपब्लिकमा ३ हजार ४०० को ज्यान गएको छ ।

उता दक्षिण अमेरिकी मुलुकहरुमा कोरोनाभाइरसको सङ्क्रमणले धेरैको ज्यान लिएको छ । कूल ६ लाख २० हजारको ज्यान गएको दक्षिण अमेरिकामा ब्राजिल सर्वाधिक प्रभावित छ । पछिल्लो विवरण अनुसार ब्राजिलमा ३ लाख ७२ हजार, कोलम्बियामा ६७ हजार, अर्जेन्टिनामा ५९ हजार, पेरुमा ५६ हजार, चिलीमा २५ हजार, इक्वेडरमा १७ हजार, बोलिभियामा १२ हजार, पाराग्वेमा ५ हजार, भेनेजुएलामा करिब २ हजारको मृत्यु भएको छ ।

एसियाली मुलुकहरुमध्ये कोरोनाभाइरसबाट सर्वाधिक असर भारतमा भएको छ । सङ्क्रमणको दर पनि उच्च रहेको भारतमा एक लाख ७७ हजारको ज्यान गइसकेको छ । इरानमा ६६ हजार, इन्डोनेसियामा ४३ हजार, टर्कीमा ३५ हजार, पाकिस्तानमा १६ हजार, फिलिपिन्समा १५ हजार, इराकमा १५ हजार, बंगलादेशमा १० हजार, जापानमा ९ हजार, जोर्डनमा ८ हजार, लेबनानमा ६ हजार, इजरायलमा ६ हजार, चीनमा चार हजार ६३६ जनाको ज्यान भइसकेको छ ।

तुलनात्मक रुपमा अफ्रिकी महादेशमा कोरोनाभाइरस सङ्क्रमण र मृत्युदरमा कमी छ । तैपनि अफ्रिकी महादेशमा करिब ४५ लाख सङ्क्रमित भएकामध्ये करिब एक लाख १८ हजारको ज्यान गएको छ ।

अफ्रिकी मुलुकमध्ये दक्षिण अफ्रिकामा ५३ हजार ७००, इजिप्टमा १२ हजार ६ सय ९४, ट्युनिसियामा ९ हजार सात सय १७, मोरक्कोमा ८ हजार नाैं सय  ४४, इथियोपियामा तीन हजार, अल्जेरियामा तीन हजार, लिबियामा २ हजार आठ सय ८२, केन्यामा २ हजार चार सय ६३, सुडानमा २ हजार, नाइजेरियामा २ हजारको ज्यान गएको छ ।

पछिल्लो एक सातामा कोरोनाभाइरसबाट करिब ५३ लाख व्यक्ति सङ्क्रमित भएका छन् जसमा भारतमा मात्र करिब १४ लाख संक्रमित भएको पाइएको छ । यो अघिल्लो साताको तुलनामा झण्डै ६४ प्रतिशत बढी हो । त्यस्तै, अमेरिकामा करिब पाँच लाख, ब्राजिलमा ४ लाख ५५ हजार, टर्कीमा करिब चार लाख, फ्रान्समा २ लाख ३७ हजार, इरानमा १ लाख ६६ हजार, अर्जेन्टिनामा एक लाख ६० हजार नयाँ सङ्क्रमित देखिएका छन्।

कोरोना संक्रमणको दोस्रो, तेस्रो लहर चलेको अवस्थामा पछिल्लो एक सातामा ८१ हजार आठ सय ६२ जनाको ज्यान गएको छ ।

अघिल्लो साताको तुलनामा यो झण्डै ७ प्रतिशत अर्थात् ५ हजार दुई सय ९७ बढी हो ।

– रासस