थापाथलीमा सर्‍याे एमाले

काठमाडौं । नेकपा एमालेको केन्द्रीय कार्यालय आजबाट थापाथलीमा सरेको छ ।

नयाँ वर्षको अवसर पारेर एमालेको केन्द्रीय कार्यालय नयाँ घरमा सरेको हो । प्रधानमन्त्री एवं पार्टी अध्यक्ष केपी शर्मा ओलीले बिहीबार बिहान थापाथली हाइटस्थित भाडाको घरमा पार्टी कार्यालयको उद्घाटन गर्नुभएको हो । पार्टीको आकार ठूलो हुने भएपछि एमालेले नयाँ घर भाडामा लिएको हो । सो घरको गत चैत ११ गते प्रधानमन्त्री ओलीले निरीक्षण गर्नुभएको थियो ।

बल्खुस्थित पार्टी कार्यालय ०७२ को भूकम्पले क्षतिग्रस्त बनेपछि एमालेले धुम्बाराहीमा भाडाको घरमा पार्टी कार्यालय सञ्चालन गरेको थियो । बल्खुमा नयाँ भवन तयार नहुञ्जेल एमालेको केन्द्रीय कार्यालय थापाथलीबाट सञ्चालन हुने छ । बल्खुमा बन्ने पार्टी कार्यालयको प्रधानमन्त्री ओलीले बिहीबार बिहान नै शिलान्यास गर्नुभएको छ ।

-आइएनए न्युज एजेन्सी