अमेरिकामा भीषण हिमपात, न्युयोर्कमा संकटकाल

न्युयोर्क — अमेरिकाको पूर्वी तटीय क्षेत्रमा हिमपातका कारण जनजीवन निकै प्रभावित भएको छ । हिमपातका कारण हवाई उडानहरू रद्द गरिएका छन् भने कोरोना भाइरसविरुद्ध खोप दिँदै आइएका केन्द्रहरू बन्द गरिएका छन् ।
अमेरिकी सञ्चारमाध्यमहरूका अनुसार न्युयोर्क र न्युजर्सीमा संकटकाल घोषणा गरिएको छ । राष्ट्रिय मौसम सेवाका अनुसार ती स्थानहरूमा निकै बाक्लो हिउँ जमेको छ । स्थानीय समयअनुसार सोमबार मध्यदिनसम्म न्युजर्सी र पेन्सल्भेनियामा २० इन्च र न्युयोर्कमा १७ इन्च हिउँ जमेको बताइएको छ । मौसम सेवाले बुधबारदेखि हिमपात केही कम हुने जनाएको छ ।