सरकार गठनमा अहिले जसपा जाँदैन- राजकिशोर यादव
काठमाडौं । ‘सरकारमा जाँदैनाैँ, चुुनावमा जान्छौँ, यही विषयमा छलफल चलिरहेको छ’ –जसपाका नेता राजकिशोर यादव भन्नुहुन्छ ।
नेपाली कांग्रेस, माओवादी केन्द्र र जनता समाजवादी पार्टी (जसपा) को उपेन्द्र यादव समूह वैकल्पिक सरकार बनाउन जोड तोडले लागेको बेला जसपाकै महन्थ ठाकुर समूहका सांसद् त्यसको विपक्षमा उभिनु भएको छ ।
कांग्रेस, माओवादीको गठबन्धनमा मिलेर जसपा सरकारमा नजाने उहाँले प्रष्ट पार्नुभयो । उपेन्द्र यादवले चाहँदैमा जसपा सरकारमा नजाने उहाँले बताउनुभयो ।
पार्टी सरकारमा नजाने भनेर राष्ट्रपतिलाई पत्राचार गरिसकिएको पनि उहाँले जानकारी दिनुभयो । ‘राजकिशोरले भन्नुभयो– ‘हाम्रो मुद्दा छुट्टै छ, सरकार गठनमा अहिले जसपा जाँदैन’, उहाँले भन्नुभयो ।
जसपाले छलफल जारी राखेको बताउँदै उहाँले तत्काल सरकारमा जाने सम्भावना नरहेको बताउनुभयो । अहिलेको आवश्यकता सरकार गठन भन्दापनि मधेशका मुद्दा सम्बोधन गर्नु रहेको यादवको भनाइ छ ।
वैकल्पिक सरकारले जसपाका माग पूरा गर्न नसक्ने भएकोले अबको विकल्प नयाँ जनादेश नै भएको उहाँले बताउनुभयो । ‘हाम्रा माग यो सदनले पूरा गर्न सक्दैन, त्यसैले अब देश अर्ली ईलेक्सनमा जान सक्छ’– यादवले भन्नुभयो ।
जसपाकै तर्फबाट सोमबार अर्का अध्यक्ष उपेन्द्र यादवले सरकारमा जाने भन्दै कांग्रेस र माओवादीसँग मिलेर संयुक्त विज्ञप्ति जारी गर्नुभएको थियो । यादवले उपेन्द्र समूूहसँग पनि यस विषयमा छलफल चलिरहेको बताउनुभयो ।
जसपामा बाहिर देखिए जस्तो विवाद पार्टी भित्र नरहेको पनि उहाँले बताउनुभयो । ‘छलफल गरेर सबै विषय सामाधान हुनसक्छ, हामी निरन्तर वार्तामा र्छौँ’, उहाँले भन्नुभयो ।
-आइएनए न्युज एजेन्सी
