सेफ्टी ट्याङ्कीमा परेर जङ्गली हात्तीको ज्यान गयाे

महेन्द्रनगर । कञ्चनपुरको शुक्लाफाँटा नगरपालिकामा सेफ्टी ट्याङ्कीमा परेर गए राति एक जङ्गली हात्तीको ज्यान गएकाे छ ।

यहाँको शुक्लाफाँटा नगरपालिका–७ स्थित वातावरण मध्यवर्ती साुमदायिक वन कार्यालय परिसरमा रहेको शौचालयको सेफ्टी ट्याङ्कीमा परेर एक जङ्गली हात्तीको ज्यान गएकाे हाे । शुक्लाफाँटा राष्ट्रिय निकुञ्जका प्रमुख संरक्षण अधिकृत किशोरकुमार मेहताले जानकारी दिनुभयो ।

“राति १२ बजेपछि जङ्गली हात्ती सेफ्टी ट्याङ्कीमा परेर मृत्यु भएको देखिएको छ ।” उहाँले भन्नुभयो, “अहिले प्राविधिकसहितको टोली गएर घटनास्थलमा मुचुल्का सङ्कलन गर्ने काम भइरहेको छ ।”

जङ्गली हात्ती बथानमा आएको हुनसक्ने उल्लेख गर्दै उहाँले ज्यान गएकाे हात्ती एक्लै छुटेर त्यहाँ आएको हुनसक्ने बताउनुभयो । ‘यसबारे थप अनुसन्धान भइरहेको छ’, प्रमुख संरक्षण अधिकृत मेहताले भन्नुभयो, ‘विधि प्रक्रिया पुर्‍याएर हात्तीको दाहसंस्कार गर्छौँ ।’
–रासस