राष्ट्रिय सभा अध्यक्ष निर्वाचन उम्मेदवारको मनोनयन दर्ता
![](https://i0.wp.com/www.risingsunkhabar.com/wp-content/uploads/2024/03/20240311084433.jpg?fit=1200%2C700&ssl=1)
काठमाडौं । राष्ट्रिय सभा अध्यक्ष निर्वाचनअन्तर्गत सोमबार उम्मेदवारको मनोनयन दर्ता हुँदैछ । संघीय संसद् सचिवालयले मंगलबार अध्यक्षको निर्वाचन हुने कार्यतालिका सार्वजनिक गरेको छ । जसअन्तर्गत सोमबार उम्मेदवारको मनोनयन दर्ता हुन लागेको हो ।
उम्मेदवारी दर्ताको समय बिहान ११ बजेदेखि दिउँसो एक बजेसम्मको लागि छुट्याइएको छ । उम्मेदवारको नामावली सोमबारै साढे एक बजे प्रकाशित हुनेछ ।
राष्ट्रिय सभा अध्यक्षका लागि सत्ता गठबन्धन र प्रतिपक्षी गठबन्धनबीच प्रतिस्पर्धा हुने देखिएको छ । सत्ता गठबन्धनबाट माओवादी केन्द्रले उम्मेदवारी दिने सहमति भइसकेको छ भने माओवादी केन्द्रले नारायण दाहाललाई उम्मेदवार बनाउने निर्णय गरेको छ ।
प्रमुख प्रतिपक्षी नेपाली कांग्रेसले पनि विपक्षमा रहेका दलहरूबीच सहकार्यको ढोका खुला राख्दै अध्यक्षमा युवराज शर्मालाई उम्मेदवार बनाउने निर्णय गरेको छ ।